Ministria e Ekonomisë ka lidhur një marrëveshje me një kompani private, e cila do të marrë me qira kundrejt shumës një euro një hapësirë prone prej rreth 42 mijë metër katror në Berat, ndërsa kompania do të investojë një shumë prej 20 milionë dollarësh.
Marrëveshja u nënshkrua publikisht nga ministrja e Ekonomisë, Milva Ekonomi, e cila theksoi se kompani do të bëjë grumbullimin, ruajtjen dhe paketimin e perimeve të freskëta në zonën e Beratit, për një periudhë 20 vjeçare.
Ekonomi: Ngjarja e investimit ka të bëjë me shifrën prej 20 milionë dollarë në periudhën 20 vjeçare dhe investimi fillestar është 2 milionë dollarë. Në vitin 2018, kjo kompani do të ketë të punësuar 50 punonjës, prandaj për ne është një ngjarje e rëndësishme që aktivizojmë një pronë që është lënë në një gjendje gati të degradimit, për t’i dhënë më shumë mundësi qytetit të Beratit që të funksionojë më mirë aktiviteti ekonomik, sidomos për prodhimet që vijnë nga zona, pasi shquhet për prodhimin e perimeve.
