Trupi i pajetë i një personi është gjetur sot në ladfillin e Sharrës në kryeqytet. Viktima është identifikuar si Ardit Gjoklaj, 17 vjeç nga Tropoja.
Trupi i pajetë u gjet nga punëtorët e pastrimit tek vend grumbullimi i mbeturinave, te cilët kanë njoftuar më pas policinë.
Adoleshenti mësohet se ishte punonjës në këtë landfill. Në duar ai kishte doreza dhe të veshur një mushama si ajo e punonjësve që mbledhin mbeturinat në terren.
Viktima dyshohet të ketë humbur jetën mbrëmjen e djeshme. Ai eshte transportuar për në morg ku do bëhet autopsia nga eksperti mjeko-ligjor, për të përcaktuar dhe shkaqet e vdekjes.
Grupi hetimor në vendin e ngjarjes po punon për gjetjen e shkakut të vdekjes.
Aktualisht po hetohet në dy pista. Njëra është ajo e ngjarjes së qëllimshme, ndërsa pista e dytë është ajo e vdekjes aksidentale.
