Prej më shumë se 14 orësh autobusi i “Unazës” që u aksidentua mbrëmjen e djeshme në Tiranë, vazhdon të jetë në mes të lumit të “Lanës”, pasi nuk është marrë asnjë masë për zhvendosjen e mjetit.
Mëngjesin e sotëm qytetarët do të duhet të përballeshin me të njëjtën pamje të një nate të kaluar, ku autobusi me dhjetëra pasagjerë përfundoi në lumin Lanë, ku 5 prej pasagjerëve mbetën të plagosur dhe pjesa tjetër e tyre shpëtuan mrekullisht.
Megjithëse policia pretendon se ndodhet 24 orë në patrullim për të parandaluar aksidentet e mundshme, ai i djeshmi tregoi edhe njëherë se puna e tyre “dështoi” sërish.
Raportohet se makina që përfundoi e kthyer përmbys poshtë autobusit të Unazës është nxjerrë nga lumi i Lanës. Ngjarja e rëndë ndodhi mbrëmjen e kaluar, kur autobusi i “Go Green” kishte zënë poshtë makinën, nga e cila u nxorën me urgjencë 2 të rinjtë nga banorët e zonës.
Dy të rinjtë që po udhëtonin me makinën e vogël, Jurgen Rama 27 vjeç shoferi dhe A. H., 27 vjeç, pasagjeri i mjetit u dërguan me urgjencë në spitalin e Traumës dhe janë jashtë rrezikut për jetën. Ndërkohë mbetën të plagosur edhe shoferi i autobusit Muhamet Kyçyku, fatorino A. K., 61 vjeç e pasagjerja F. Ç., 64 vjeçe. Ndërkohë autobusi vijon të jetë ende në lumin e Lanës ndërsa nuk dihet se si do të operojnë për ta nxjerrë.
Grupi hetimor po punon për sqarimin e rrethanave të aksidentit, ku nga sa është raportuar paraprakisht makina i ka prerë rrugën autobusit, megjithatë vijojnë hetimet për të zbardhur të plotë të gjithë ngjarjen.
