Ishte viti 1961, data 28 maj, kur kundëradmirali i flotës ushtarake detare, Teme Sejko dhe “grupi armiqësor çam” u vendosën para “drejtësisë” së diktaturës komuniste. Bashkë me të tjerë intelektualë pjestarë të popullsisë së Çamërisë, Teme Sejko u akuzua për tentativë për përmbysje me dhunë të pushtetit popullor.
Xhelati Aranit Çela, ishte prokuror i përgjithshëm i cili lexoi edhe pretencën në ngarkim të “grupit armiqësor çam”. Është një ndër gjyqët më të egra të kryera gjatë regjimit komunist, ku u pushkatuan Teme Sejko, Tahir Demi, Taho Sejko, Shaban Ademi, Avdul Resuli, Ali Xhelo Arapi, Hajri Mane ndërsa familjet e tyre u internuan e persekutuan nga regjimi.
Detaje të rëndësishme të gjyqit ndaj “grupit armiqësor çam” sjell dokumentari i realizuar nga gazetari Ferdinand Dervishi në ABC news. Ky gjyq ka hyrë në historinë e krimeve të komunizimit si një megagjyq me dënimet më të mëdha, përmes sajesave më absurde të një prokurorie politike me vendime politike, me dënime kriminale më të padëgjuara në historinë kriminale të diktaturës staliniste të Enver Hoxhës.
Gjyqi u zhvillua në kinema “Brigada” në vitin 1961 dhe ishte me dyer të hapura.
