I ndaluar edhe administratori i kompanisë ndërtuese
Një pallat 6-11-12 kate I ndërtuar pa leje në lagjen “Pavarësia” të Vlorës ka cuar në arrestimin e administratorit të kompanisë ndëruese dy kryeinspektorëve dhe tre inspektorëve të INUV. Arrestimi I tyre është bërë me urdhër të Prokurorisë së Vlorës që i kishte nisur hetimet pas kallzimit të dy qytetarëve. Policia ndaloi Kryeinspektorin e Inspektoratin Vendor Urbanistik në detyrë, paraardhësin e tij, 3 inspektorë të INUV, si edhe administratorin e “Endriu 008”, që ndërtonte palltin. Punimet për ndërtimin e pallatit sipas Prokurorisë së Vlorës kishin nisur që prej vitit 2014, pa u pajisur me lejen e ndërtimit. Në bazë të dokumentacionit të mbledhur gjatë hetimit të këtij procedimi penal, rezultoi se Inspektorati Vendor Urbanistik (INUV) i Bashkisë Vlorë ka pasur dijeni për ndërtimin e këtij pallati dhe nuk ka kryer asnjë urdhërim për ndalimin e tij .
“INUV-i kishte dijeni për këtë pallat, jo vetëm për faktin që ndërtimi është i dukshëm, por edhe sepse në datë 12.05.2014, nga kryeinspektori pranë INUV Bashkia Vlorë është marrë vendim për pezullimin e ndërtimit, duke parashtruar se “subjekti Endriu 08 ka nisur punimet për ndërtimin e objektit banesë 6-11-12 kate pa njoftuar më parë INUV si dhe mungon dokumentacioni tekniko ligjor në kantier”. Megjithatë, punimet për ndërtimin e pallatit kanë vijuar pa asnjë pengesë nga ana e autoriteteve publike. Vendimi për pezullimin, por që nuk është zbatuar, është nxjerrë nga ana e Kryeinspektorit të INUV në atë kohë, i dyshuari Besnik Karabolli, i cili e ka mbajtur këtë detyrë deri në muajin nëntor 2014”, thuhet në njoftimin e Prokurorisë Vlorë e cila mbi këtë bazë ka nxjerrë urdhërat e ndalimit pasi vlerëson se janë konsumuar elementët e veprës penale të “Shpërdorimit të detyrës” dhe “Ndërtimit të paligjshëm”. Të ndaluarit janë:
Edmond Aliaj, administrator i subjektit “Endriu 008″shpk.
David Tushaj, me detyrë Kryeinspektor i INUV,bashkia Vlorë
Besnik Karabolli,me detyrë kryeinspektor i INUV (Qershor 2012- Nëntor 2014).
Iriald Dervishaj,, me detyrë inspektor i INUV, Bashkia Vlorë.
Marjol Mustafaraj, me detyrë inspektor i INUV, Bashkia Vlorë
Endri Zeneli,me detyrë inspektor i INUV, Bashkia Vlorë
