Nderohen me çertifikatë mirënjohje mësuesit e shkollës Gjonpepaj, e para shkollë shqipe në Tropojë
Nga Ndoc Mulaj
Qindra festarë mbushën sheshin e rinuar të Nikaj-Merturit qysh në orët e para të mëngjesit, ardhur nga të gjitha anët e Shqipërise, nga Kosova, por dhe emigrantë nga jashtë Shqipërisë. Ata që binin më shumë në sy sot, jo vetëm nga thinjat por edhe nga gëzimi që u rrezatonte në ballë, ishin shenjorët tanë, mësuesit e dritës e diturisë së Nikaj-Mërturit, ata që na nderuan për 100 vjet e u nderuan sot. Faleminderit Besnik Dusha për mirënjohjen ndaj tyre dhe për gjithcka që po bën për Nikaj-Mërturin.
Aktiviteti u moderua nga i talentuari i skenës e fjalës, në këto troje e më tej, Marash Mhilli, dhe vajza e re plot talent dhe sharm nga Mërturi, Besiana Mulaj. Janë shumë për t’u falenderuar për organizimin dhe mbarëvajtjen e kësaj feste por do të veçojmë Giz Albania që me mbështetjen e saj është bërë promotor i zhvillimit të turizmit në Alpe si dhe një mirditor, mastershefin e shijes shqiptare, të palodhurin Sokol Prenga i cili u kujdes mjeshtërisht që rakia e festës të shoqërohej edhe me meze, ofruar me zemërbardhësi nga Gjevalin Gjeloshi, stërnipi i legjendës ndëmale Hajdar Ahmatit të Nikajve.
Për më shumë se katër orë, fjalë zemre nga drejtuesit e mirënjohje për shenjtorët tanë, mesuesit-pishtarë të dritës, si edhe për të tjerë nikaj-merturas të artit e kulturës. Aktiviteti kulmoi me zërin e rrallë të këngëtarëve nikaj-merturas, valle popullore, panairi i librit me autor nikaj-merturas, panairi me prodhime vendase dhe sipas zakonit, bukë e krypë e zemër të bardhë.
