Nga Edona Haklaj
“Ah, sikur rinia të dinte dhe pleqëria të mundte!”
Kjo ndoshta do të ishte motoja e takimit qe WPS Albania, (Qendra gratë në shërbim publik) organizoi ditën e djeshme. Kjo qendër, në vijimësi të aktiviteteve dhe takimeve të ndryshme për fuqizimin dhe rritjen e numrit të femrave në shërbimet publike, organizoi dje aktivitetin e rradhës në “Shtëpinë e të moshuarve” në Tiranë. Drejtorja ekzekutive e kësaj qendre, Mimoza Hajdarmataj tha: “Ideja është që përveç se është 1 Maji, dita e punëtorëve, dhe kjo shtresë i përket më të harruarve dhe më të pavlerësuarve për kontributin që kanë dhënë në ndërtimin e vendit, në këtë moshë kanë edhe nevojën e ngrohtësisë dhe për pak dashuri”.
Anëtaret e WPS, vizituan çdo dhomë të shtëpisë, në mënyrë që të njiheshin nga afër me të moshuarit që ishin në gjendje të rënduar shëndetësore, por dhe me kushtet që ky ambient u ofronte.
“Ne duam vetëm të na vini, duam vetëm shoqëri, njerëz për të folur, për të biseduar, se me njëri-tjetrin i kemi konsumuar të gjitha bidesat tona. Nuk duam njerëz që vijnë këtu sa për tre sekonda, sa për të na marrë në kamera dhe për të na harruar, si përherë. Për gjërat e tjera pastaj, për kushtet, për ushqim, përpiqemi t’ia dalim, edhe mirë, edhe keq, përderisa jeta na ka sjellë këtu.”
Këto ishin fjalët e disa prej tyre, të cilët përpiqen t’ia dalin dhe të jetojnë ato ditë që u kanë mbetur, duke pritur dikë që t’i vizitojë, t’u dhurojë dashuri dhe ngrohtësi.
