Një vatër zjarri me përmasa të mëdha është aktivizuar në fshatin Dëshiran të Bashkisë Belsh. Mësohet se zjarri ka përfshirë një sipërfaqe të madhe me ullinj dhe agrume.
Era e fortë dhe temperaturat e larta po favorizojnë përhapjen me shpejtësi të flakëve në të gjitha drejtimet duke djegur në pak kohë disa hektarë me ullishta dhe agrume.
Për izolimin dhe shuarjen e flakëve janë mobilizuar forcat dhe mjetet e shërbimit zjarrfikës të bashkive Belsh, Kuçovë e Cërrik. Në ndihmë të tyre në terren janë edhe dhjetëra banorë të zonës dhe punonjës të shërbimit pyjor. Kryebashkiaku i Belshit, Arif Tafani shprehet se situata për momentin është mjaft problematike, por po punohet maksimalisht për vënien e saj nën kontroll të plotë sa më shpejt.
Bëhet me dije se vatra e zjarrit ishte shumë pranë banesave, por falë punës së jashtëzakonshme të shërbimit zjarrfikës të Belshit e Cërrikut u neutralizua përhapja më tej.
Gjithashtu iu është bërë thirrje banorëve të zonës për t’u mobilizuar të gjithë për të kontribuar në përballimin me sukses të kësaj situate.
