Sot është dita e 20-të e kërkimeve për gjetjen e trupit të 30-vjeçarit Jurgen Karaj, i cili dyshohet se ka përfunduar në përroin e Darsit, në Bashkinë Klos. Pas 20 ditësh, shteti shqiptar nuk ka asnjë rezultat, asnjë gjurmë dhe asnjë përgjigje për familjen, duke treguar qartë se përballë emergjencave reale funksionon me improvizim dhe jo me kapacitete.
Edhe pse Ministri i Mbrojtjes, Pirro Vengu deklaronte më herët se vijojnë kërkimet ‘intensive’ për të riun, prej 20 ditësh tashmë ende nuk ka asnjë gjurmë prej tij dhe trupi ende nuk është gjetur.
Pavarësisht se në terren janë ushtria, forcat “Shqiponja”, zjarrfikëset, punonjës bashkie dhe dhjetëra persona, kërkimet janë zhvilluar pa mjete serioze teknologjike për operacione nënujore. Shqipëria ende nuk disponon skanerë ujorë dhe dronë nënujorë funksionalë, çka e bën të pamundur një operacion efektiv dhe i ekspozon institucionet si të papërgatitura dhe të prapambetura.
Sot pritet të mbërrijë ekipi i specializuar nga Kosova, i autorizuar nga Presidentja Vjosa Osmani, me pajisje si skaneri EDGE TECH 5201 dhe droni nënujor DEEP Trekker DTG 3 ROV, duke e nxjerrë zbuluar dështimin e plotë të shtetit shqiptar. Fakti që pas 20 ditësh kërkime shpresa vjen nga motra Kosovë nuk është bashkëpunim, por turp institucional dhe provë se Shqipëria nuk ka ndërtuar as kapacitetet minimale për të përballuar fatkeqësi të tilla.
Jurgen Karaj, dyshohet se u mor nga rrjedha e përroit të fshatit Dars në Klos, më 9 janar, dhe ka përfunduar në lumin Mat. Ai ishte duke udhëtuar me një mjet tip “Audi” me drejtues 24 vjeçarin Andi Losha, kur ky i fundit humbi kontrollin dhe ranë në përrua.
Karaj dyshohet të jetë marrë nga rrjedha, ndërsa ende nuk ka asnjë gjurmë prej tij. Ndërkohë Andi Losha u arrestua nga policia, pasi dyshohet se nuk e ka ndihmuar 30-vjeçarin.
