Anëtarja e kryesisë së Partisë Demokratike, Ina Zhupa ka folur mbrëmjen e sotme në një emision televiziv për zgjedhjen e Presidentit të ri, duke e quajtur farsë procesin, ku mori pjesë dhe opozita.
Zhupa tha se procesi ishte stisje pasi kushtetuesja nuk thotë që kryetarët duhet të bien dakord, por 20 deputetë, pavarësisht nga grupi mund të propozonin një emër. Ajo tha se në proces, pati edhe opozita gabimet e veta, e cila duhet të nxirrte një apo dy emra dhe jo të diskutonte kriteret.
“Opozita ka një të drejtë kushtetuese, 20 deputetë mund të propozojnë një deputet, nuk ka lidhje grupi. E gjithë situata u stis që t’i jepte pretenca vetëm kryetarëve të grupeve parlamentare. Ky ishte një krijim i Taulant Ballës, i Alibeajt, sepse në kushtetutë nuk parashikohet diçka e tillë që kryetarët duhet të bien dakord. Opozita duhet të kristalizonte një apo dy kandidatë. U bënë disa përpjekje për një marrëveshje dhe u quajt arritje që Balla që me 20 firma mund të propozoni një president. Kjo është kushtetuese. Ka bërë gabimet e veta dhe opozita. Unë kam qenë që në krye të herët që duhet të shkojmë me emër dhe staturë të tillë që maxhoranca kur ta rrëzonte të humbte kredenciale. Ne nuk jemi shoqëria civile. Nuk mund të jetë PD diskutuese e kritereve dhe atje shkohet me një emër, apo dy emra“, u shpreh Zhupa.
