Presidenti i Ukrainës, Volodymyr Zelensky është përlotur gjatë momentit që ka mbajtur fjalimin para Parlamentin Evropian, teksa vendi i tij ndodhet prej gjashtë ditësh i pushtuar nga Rusia.
I përlotur dhe me zërin që i dridhet, Presidenti Zelensky u shpreh se nuk di si t’i përshëndesë eurodeputetët me “mirëmëngjes” apo “mirëmbrëma”, pasi për disa qytetarë të tij në Ukrainë sot mund të jetë dita e fundit.
“Të pranishëm në këtë seancë plenare, ju përshëndes. Nuk di si t’iu falënderoj e përshëndes të gjithëve, pasi nuk mundem të them mirëmëngjes apo mirëmbrëma, sepse çdo ditë për disa njerëz është e fundit. Unë flas sot për qytetarët e mi, për qytetarët e Ukrainës që po mbrojnë duke paguar dhe çmimin më të lartë, po mbrojnë lirinë. Jam i lumtur që është kjo frymë bashkuese, jam i lumtur që jeni bashkuar të gjithë vendet e BE. Nuk e kam ditur, por ky është çmimi që ne duhet të paguajmë”, tha Presidenti Zelensky.
Me lot në sy, Zelensky i bëri thirrje Putinit të ndalë sulmin pasi vetëm gjatë ditës së djeshme predhat e tij kanë vrarë 16 fëmijë, ndërsa i kërkoi vendeve të BE ta ndihmojnë të fitojë luftën.
“Ukraina ka zgjedhur Bashkimin Europian dhe këtë mëngjes ishte tragjike pasi qyteti është sulmuar, është qyteti me universitetet më të shumta në të gjithë vendin. Aty ku janë edhe sheshet më të mëdha, është goditur qendra e këtij qyteti. Ishte tentativë e pastër për të vrarë guvernatorin, këto janë krime lufte. Të gjithë qytetarët në atë qytet tashmë janë të bllokuar. 16 fëmijë janë vrarë vetëm ditën e djeshme, dhe presidentin Putin nuk ndalet duke vijuar disa operacione. Nuk po argumenton ndaj kujt po lufton. Qytetarët e Ukrainës janë të motivuar dhe të guximshëm dhe po ne luftojmë për të ardhmen tonë për mbijetesën. Unë besoj se do të luftojmë për të qenë anëtarë të barabartë të Europës, për ti treguar BE që ne dritën e shikojmë nga perëndimi dhe ne nuk bëjmë dot pa ju. Sot ju treguat që jeni me ne. Tani është momenti që ju ta faktoni që ne nuk do të humbim që jeta të fitojë përballë vdekjes dhe ndriçimi përballë errësirës”, përfundoi Zelenskyy, ndërsa e gjithë salla e Parlamentit Europian u çua në këmbë dhe shpërtheu në duartrokitje.
Ukraina po vazhdon rezistencën e saj ndaj sulmit rus në ditën e 6 të pushtimit, ku pavarësisht sanksioneve të ashpra të Perëndimit, Putini paraqitet i sigurt në arritjen e objektivave të tij në Ukrainë.
