Deputeti i Partisë Demokratike Zef Hila, ka debatuar në seancën plenare me ministren e Shëndetësisë, Ogerta Manastirliu për qendrën sociale “Besa” në Vaun e Dejës duke i thënë se po dezinformon qytetarët.
Hila akuzoi ministren se fondet e alokuara për qendrën janë përdorur për punësime dhe jo për shërbime në qendrën sociale “Besa”, sic pretendon ministrja.
Nga ana tjetër, Manastirliu e ftoi deputetin e PD që të zhvillojnë nga afër një vizitë në qendrën sociale për të parë edhe shërbimet që marrin të moshuarit, duke mohuar akuzat.
Hila: Ju mungon dëshira, vullneti. Nga verifikimet e kontrollit ato që ju cituat nuk janë të vërteta, nga verifikimi i grupit të inspektimit rezulton që në qendrën Besa, faktet janë ndryshe. Ju vini këtu dhe dezinformoni qytetarët. Fondet e deleguara nga Ministria, ju paguani katër roje, paguhen kuzhinier në një kohë që shërbimi i gatimit është me katering. Tërhiqni fjalët tuaja, të vërtetat janë krejt ndryshe. Fondet e akorduara për qendrën sociale Besa nga Ministria e linjës janë për stafin drejtues, po kontrollojini sepse inspektimi ka qenë formal. Realiteti është ndryshe, unë vij nga terreni e njoh shumë mirë zonë dhe e vërteta është ndryshe”.
Manastirliu: Këtë foltore e kam të shenjtë dhe jam betuar se do të them të vërtetat dhe do t’i shërbej qytetarëve. Do të doja t’ju ftoja të shkonim bashkë dhe të bënim një vizitë në qendrën rezidenciale “Besa” dhe ju ta shihni me sytë tuaj se çfarë do të thonë të moshuarit. Ne jemi duke punuar për të siguruar qëndrueshmërinë e financimit që të mos mbetemi peng. Të mos harrojmë se shërbimet i shkojnë njerëzve.
