Zëdhënësja e KQZ-së, Drilona Hoxhaj ka paralajmëruar të gjithë administratën zgjedhore t’i përmbahen respektimit të kodit zgjedhor sepse përndryshe do të mbajnë përgjegjësi ligjore.
Hoxhaj nënvizoi se çdo lloj funksioni për administrimin zgjedhor nuk konsiderohet veprimtari për qëllime partiake.
“Për administrimin e proçesit zgjedhor të 25 qershorit 2017 në të tre nivelet e administratës zgjedhore të përkohshme, komisionet e zonës së administrimit zgjedhor,komisionet e qendrave të votimit, grupet e numërimit, do të angazhohen rreth 40 mijë shtetas si komisionerë apo numërues. Pavarësisht se administrata zgjedhore propozohet nga partitë politike, emërimi i tyre në detyrën e komisionerit apo numëruesit ngarkon secilin prej tyre me përgjegjësi ligjore për të administruar proçesin zgjedhdor sipas rregullave të kodit zgjedhor në mënyrë të paanshme dhe transparente. Marrë shkas nga disa shqetësime të shprehura nga komisionerët, trajnuesit dhe inspektorët rajonalë zgjedhorë pas ndryshimeve të fundit ligjore të miratuara nga Kuvendi, KQZ informon se çdo lloj funksioni për administrimin zgjedhor nuk konsiderohet veprimtari për qëllime partiake.”-shprehet Hoxhaj.
