E treta e vërteta… Kjo verë mund të jetë e duhura për të transferuar Pol Pogbanë në Madrid. Menjëherë sapo u mësua se Zinedin Zidan do të jetë trajner i Realit edhe për sezonet e ardhshme, është logjike që drejtuesit t’i afrojnë një futbollist që e vlerëson shumë.
Prej kohësh ai e ka dashur ta ketë në ekipin e tij mesfushorin francez dhe ky duket se është viti i duhur. Pavarësisht krizës ekonomike që ka përfshirë skuadrat për shkak të koronavirusit, Reali i Madridit ndihet i fortë për të bërë një transferim të tillë.
Vera e vitit 2016- Reali po negocionte me Juventusin dhe Raiolën për transferimin e lojtarit, i cili ishte i kërkuari i Zidanit. Në atë moment, pavarësisht dëshirës që Pogba kishte për të veshur fanellën e Realit, u detyrua të shkonte në Mançester pas presioneve të shumta nga agjenti i tij për aspektin ekonomik. Junajtid pagoi 105 milionë euro për Juventusin dhe 40 milionë për Raiolën.
Vera e vitit 2019- Sërish pati një tentativë, por kurrë nuk u arrit marrëveshja. Pogba po shtynte për një largim nga Anglia dhe për të nisur një aventurë të re, por Perez këtë herë i shpenzoi milionat për të transferuar Hazardin, Rodrigon, Viniciusin dhe Militaon. Për këtë arsye Zidan mbeti i pakënaqur, por presidenti i ka premtuar se do të bëjë një sforco në të ardhmen.
Vera e vitit 2020- Kjo mendohet se do të jetë e duhura. Momenti kur Zinedin Zidan dhe Pol Pogba mund të përqafojnë njëri-tjetrin duke pasur veshur fanellën e Realit të Madridit. Raporti mes klubit madrilen dhe Raiolës është rregulluar dhe kjo është një arsye më shumë pse transferimi mund të kryhet. Kontrata e Pogbasë përfundon në vitin 2021, por Junajtid nuk dëshiron ta humbasë me 0 euro dhe do të detyrohet ta largojë këtë verë. Sigurisht që vlera e tij do të jetë më e ulët për shkak të dëmtimeve që ka pasur dhe krizës nga virusi.
GENTJAN ALINANI-PANORAMASPORT.AL
