Zbulohet dosja e celulës së spiunazhit në Shqipëri, për të cilën Shërbimi Informativ Shtetëror, përmendi në raportin e veprimtarisë së tij për vitit 2021, që dorëzoi pak ditë më parë në Kuvendin e Shqipërisë.
Dokumentet e siguruara nga burime tepër konfindenciale në SPAK, hedhin dritë mbi një hetim të nisur nga SHISH, struktura e antiterrorit në Policinë e Shtetit dhe prokuroria e Posaçme, duke u vënë në mbikëqyrje të rreptë 5 persona, si Frederik Ymerin, Gjergji Kotin, Bashkim Abazi, Luftar Çunaj, dhe Maksim Ferra.
Që prej janarit 2021 e deri më sot këta persona janë në ndjekje të këtyre institucioneve, ndërsa hetimi i dosjes me Nr.3, është mbajtur sekret nga SPAK dhe SHISH.
Në dokumentacion thuhet se procedimin Nr.3, i nisur për veprat penale të “Dhënies informatave sekrete”, “Marrja e Shpërblimeve”, “Vënia në shërbim të shteteve të huaja” dhe “Grup i strukturuar kriminal”, e administron prokurori Altin Dumani, i cili ka kryer veprime përgjimi të tre subjekteve të dyshuara, kontrollin e banesave dhe zyrave të tyre dhe vëzhgimin në terren të tre personazhe, informon Ora News.
Fillimisht hetimi nga nisur nga agjentët e SHISH, dhe më pas informacioni i është kanalizuar drejtorisë së antiterrorit në Policinë e Shtetit, me qëllim vijimin e veprimeve procedurale në dobi të dosjes penale që kishte regjistruar Altin Dumani në SPAK.
Në dosje thuhet se subjekti i dyshuar për spiunazh, Frederik Ymeri, ka qenë pjesë e Shërbimit Informativ Shtetëror dhe se detyrën e fundit në këtë institucion e ka pasur në vitin 2003 si Drejtor i Krimit të Organizuar në Aparatin Qëndror të Shërbimit Informativ Shtetëror.
Ndërsa Maksim Ferra, thuhet në dosje është një tjetër kuadro i vjetër i spiunazhit dhe deri në vitin 2000 ka qenë pjesë e sektorit të vëzhgimit në Aparatin Qendror të Shërbimit Informativ Shtetëror.
Maksim Ferra, aktualisht drejton qendrën jofitimprurëse me emrin “Unioni Stop Krimit”, të cilën e ka regjistruar në gjykatë qysh prej shkurtit 2015.
Personi tjetër Gjergji Koti, që sipas SPAK dhe SHISH, është i përfshirë në këtë veprimtari agjenturore, është një ish-oficer Policie që ka shërbyer pranë Shërbimit të Çështjeve të Brendshme dhe Ankesave në Policinë e Tiranës.
Më tej në dosjen e SHISH dhe drejtorisë së Antiterrorit tregohet se Maksim Ferra, Gjergji Koti, Bashkim Abazi dhe Luftar Çunaj, janë rrjeti informative i Frederik Ymerit.
Ymeri synon sigurimin e informacionit të klasifikuar, që cenon veprimtarinë e institucioneve të rëndësishme shtetërore të sigurisë dhe jo vetëm.
SPAK thotë se deri tani nuk janë arritur të sigurohen të dhëna konkrete në lidhje me destinacionin përfundimtar të këtyre informacioneve, por dyshohet se kjo veprimtari cenon sigurinë kombëtare në formën e spiunazhit.
“…bazuar në informacionet që disponon SHISH, interesimet e Frederik Ymerit, janë shumë dimensionale lidhur me sigurimin e informacionit të klasifikuar, informacion të cilin dyshohet se e siguron nga lidhjet e tij në institucionet e sigurisë dhe konkretisht në Ministrinë e Brendshme dhe Shërbimin Informativ Shtetëror të Republikës së Shqipërisë. Deri aktualisht, të dhënat tregojnë së Frederik Ymeri, gjatë zhvillimit të kësaj veprimtarie, siguron informacion nga dy lidhjet e tija të ngushta, Gjergj Koti dhe Maksim Ferra…”-thuhet në dosjen hetimore, siguruar nga Ora News.
Maksim Ferraj kreu i grupit të spiunazhit
Gjithashtu disponohen informacione se në një rast Frederik Ymeri dhe Maksim Fera, kanë bërë më dije një person të paautorizuar që është pjesë e shërbimeve jo mike (Ruse-Iraniane) në vendin tonë, lidhur me emra të punonjësve të veçantë të institucioneve të sigurisë në vend, duke cënuar kështu rëndë veprimtarinë e tyre në tërësi.
