Një shqiptar 30-vjeçar është arrestuar nga policia greke, pasi ka përdhunuar një adoleshente 17-vjeçare të hënën e 11 prillit. Mediat greke kanë zbardhur se çfarë ka ndodhur mes shqiptarit dhe adoleshentes, të cilën e kishte njohur në Instagram.
Ka qenë vetë 17-vjeçarja e cila e shoqëruar nga e ëma ka denoncuar në polici përdhunimin nga 30-vjeçari, ndërsa shqiptari pas aktit të dhunës e ka shoqëruar në shtëpi me motor, duke e kërcënuar se do ta vriste në rast se do të tregonte për atë që kishte ndodhur.
Adoleshentja ka rrëfyer se mbrëmjen e 11 prillit 30-vjeçari e ka bindur që të kryejnë një shëtitje më pas e ka çuar në shtëpinë e tij rreth orës 21:30. Pasi kanë hyrë brenda banesës, shqiptari ka ngritur zërin e televizorit në mënyrë që komshinjtë të mos dëgjonin zhurma dhe më pas ka përdhunuar adoleshenten.
E gjithë situata sipas vajzës ka zgjatur rreth 30 minuta, më pas shqiptari e ka marrë dhe e ka dërguar në shtëpi me motor dhe i ka thënë që mos tregojë pasi sapo ka dalë nga burgu.
I arrestuari nuk pranon akuzën, duke thënë se gjithçka është bërë me konsensus.
