Detaje të reja dalin në dritë nga ekzekutimi i biznesmenit Kastriot Reçi mëngjesin e sotëm në qytetin e Rrëshenit.
Mësohet se në momentin e vrasjes, Reçi sapo kishte dalë nga lokali i tij ku kishte konsumuar kafen e mëngjesit, ndërsa autori e vëzhgonte nga taraca e një pallati aty pranë. Autori ishte pozicionuar në tarracën e një pallati dhe e ka qëlluar Kastriot Reçin nga 150 metra larg, ndërsa menjëherë pas vrasjes është larguar. Autori është siguruar që Kastriot Reçi të mos i mbijetonte këtij atentati pasi i vetmi plumb që është qitur, e ka kapur biznesmeni në pjesën e majtë të kraharorit, direkt në zemër.
Armën e krimit, model snajper, autori i maskuar e ka lënë në katin e parë të pallatit nga ku ka kryer vrasjen, ndërsa kamerat e zonës e kanë fiksuar. Policia ka marrë në pyetje dhe bashkëshorten e 47 vjeçarit, e cila ka mohuar që Kastriot Reçi të kishte konflikte apo të ishte kërcënuar.
Dyshohet se ekzekutimi mafioz është bërë për hakmarrje dhe ka lidhje me veprimtarinë kriminale të 47-vjeçarit dhe vëllait të tij Gasper Reçi, i vrarë në prill të vitit 2017 në Itali.
