Dhëndri i ish-kryebashkiakut të Elbasanit, Sokol Sanxhaktari është dënuar me 15 vite burg, pasi akuzohet për vrasjen e shokut të tij Florian Lamçe. Ndërsa me tetë vite burg është dënuar Adriano Hajdari, i cili ka pasur rol ndihmues në krim. Të dy përfitojnë ulje të dënimit për shkak të gjykimit të shkurtuar. Përfundimisht, Sanxhaktari do të vuajë vetëm 10 vite nga dënimi i marrë, kurse Hajdari do të qëndrojë pas hekurave 5 vite e 4 muaj.
Si ndodhi ngjarja
Ekzekutimi i Florian Lamçes ndodhi dy vite më parë, në ambientet e lokalit “Piazza delsol”, në qendër të Elbasanit, teksa shoqërohej nga dy miqtë e tij, për të pirë dhe për tu argëtuar. Mësohet se ata kanë qëndruar përgjatë gjithë natës në lokal dhe rreth orës 05:30 të mëngjesit miqtë kanë nisur të përleshen me njëri-tjetrin. Konflikti banal ka nisur si pasojë e teprimit më lëndë alkoolike, por dyshohet të kenë konsumuar dhe kokainë më tepër seç duhet. Më pas në bisedë e sipër, situata ka degraduar duke bërë që të rinjtë të zihen me njëri-tjetrin duke përdorur shishet e birrës dhe për pasojë kanë lënë të vdekur në vend Florian Lamçen. Ajo që bën përshtypje është se pak orë pas ngjarjes, lokali i ngjante një dite të zakonshme. Tavolinat e tij ishin të mbushura me klientë. Gjithsesi jo vetëm aty, por qytetarët në përgjithësi refuzojnë të flasin për ngjarjet kriminale, pasi në 10 ditë janë regjistruar 10 vrasje. Burimet bëjnë me dije se Lamçe ka qenë i dënuar me tre vite burg për akuzën e “pengimit të zbardhjes të së vërtetës”. Gjithashtu Lamçe është hetuar edhe për dy plagosje, por në fund ka vuajtur dënimin e vetëm për akuzën e mësipërme.
