Gjykata e Korçës ka lënë në burg pa afat 36-vjeçarin Ali Zili, i cili kreu vrasjen e dyfishtë të Fatmira Bamit dhe Bukurie Bamit, në fshatin Progër të Devollit, pak ditë më parë.
Para gjykatës Zili ka pranuar krimin duke thënë se e ka kryer në gjendje të dehur, ndërsa shkak është bërë një borxh prej 6 mijë lekësh që viktimat i kanë pasur për blerjen e druve.
Avokati mbrojtës i Zilit, Denion Shehu, tha për mediat se 36-vjeçarit do t’i kryhet një analizë psikiatrike, për të parë nëse është i aftë apo jo mendërisht, ku rrezikon burg të përjetshëm për veprën e rëndë.
“Gjykata ka kërkuar masën e arrestit me burg, duke u nisur nga fakti i veprës tejet të rëndë. Ne kemi kërkuar në vazhdimësi të hetimeve, një inspektim psikiatriko-ligjor, për të përcaktuar nëse ky person ka pasur apo jo çrregullime mendore gjatë kryerjes së veprës penale. Për momentin nuk është i kartelizuar, ka dhënë sqarimet e sakta, edhe kur është pyetur në cilësinë e personit në hetim. Dënimi parashikon deri në burgim të përjetshëm, autori e ka pranuar veprën penale, duke thënë se viktimat i kishin një borxh për 6 mijë lekë të reja, që nuk ja kanë shlyer për drutë”, tha avokati mbrojtës i Zilit.
Fatmira dhe Bukurie Bami, u gjetën të masakruara në banesën e tyre, nga kryeplaku i fshatit, ndërkohë që Zili u largua nga fshati për tu arrestuar dy ditë më vonë ku pranoi krimin në polici.
