Prokuroria e Tiranës ka kërkuar 30 vite burg për Klajdi Shundin, personin e dyshuar për vrasjen e kunatit të tij, Vladimir Zvezhdës. Ngjarja e rëndë ndodhi në ditën e parë të vitit 2021, pas ndërrimit të viteve rreth orës 03:45, ku 34-vjeçari Klajdi Shundi, në gjendje të dehur goditi me thikë në qafë kunatin e tij, Vladimir Zvezhda, 42 vjeç, i cili ndërroi jetë në spital.
Shundi kishte ftuar motrën dhe kunatin me rastin e Vitit të Ri për të festuar blerjen e një apartamenti të ri. Pasi kanë pirë dhe janë dehur, viktima ka nisur të konfliktohet me bashkëshorten e tij, e cila është njëkohësisht dhe motra e 34-vjeçarit.
Më pas Shundi i ka kërkuar Zhvezhdës që të mos grindej në shtëpinë e tij, por të shkonte dhe të sqarohej në banesën e tyre .Pasi ka dalë nga banesa e Shundit poshtë pallatit, sherri ka vijuar midis dy bashkëshortëve dhe fëmijët e tyre lajmëruan dajën e tyre që të zbriste poshtë. Pasi janë përplasur fizikisht, 34-vjeçari e ka goditur me thikë në qafë kunatin e tij duke i shkaktuar vdekjen.
