Kanë kaluar 3 ditë nga vrasja në fshatin Gështenjas në Pogradec, ku mbeti i vrarë 65-vjeçari, Safet Hyskollari, dhe autori i krimit ende nuk është kapur nga policia. Kërkimet për 63-vjeçarin Fatmir Manellari vazhdojnë ende nga patrullat policore, ndërsa janë shtrirë edhe në zonën e Mokrës.
Deri tani nuk ka asnjë gjurmë të tij në çdo vend që është kërkuar, ashtu si nuk ka asnjë raportim se mund të jetë parë nga kalimtarë apo banorë zonash, ç’ka ngre dyshime se edhe mund të jetë vetëvrarë.
Kujtojmë se Fatmir Manellari vrau fqinjin e tij, Safet Hyskollari për një mosmarrëveshjeje që kishin për një tokë, e cila nuk i përkiste ligjërisht as autorit, e as viktimës.
63-vjeçari Fatmir Manellari, autori i vrasjes edhe pse nuk banonte pranë kësaj rruge u konfliktua me 65-vjeçarin, pasi nuk ishte dakord që ai të vendoste tuba, pasi kishte frikë se për shkak të tubave shtëpia e tij mund të përmbytej gjatë dimrit.
Viktima Safet Hyskollari kishte 20 vite që jetonte e punonte së bashku me bashkëshorten në SHBA, ndërsa kishte vetëm një vit që kishte dalë në pension dhe së bashku me gruan ishin rikthyer në fshatin e lindjes për të kaluar vitet e pleqërisë.
Që nga rikthimi në fshat viktima ka pasur konflikte të vazhdueshme me Fatmir Manellarin. Autori dhe viktima nuk kanë pasur asnjëherë konflikt verbal më parë. Kjo shpjegon edhe faktin se përse asnjëherë nuk është kërkuar ndihmë në polici.
