Krimi në familje tronditi dje sërish vendin. 56-vjeçari Qemal Bici vrau me sëpatë gruan e tij Menturie Bici 53-vjeç dhe më pas vari veten, në Librazhd.
Në dhjetor, në prag të ndërrimit të viteve, autori ka dhënë një intervistë për ABC. Bici ka komentuar situatën e vështirë ekonomike, ndikuar nga pandemia e Covid-19.
“Mos të shkojë mendja se i gjithë ky popull këtu ka ardhur për të blerë, por kanë ardhur më shumë për të dalë se u mërzitën duke ndenjur në fukarallëk. Bëj një xhiro nëpër Pazar dhe shiko a gjen njeri me çantë në dorë duke blerë për Vitin e Ri. Nuk kanë asgjë fare. Unë sot kam blerë vetëm letra për të dredhur duhan. Ky është Viti Ri i imi, fukaralliku dhe pa bukë në shtëpi. nuk kam bukë në shtëpi,” ka thënë ai asokohe për gazetarin Agim Blloshmi.
Ngjarja e rëndë ndodhi ditën e djeshme në fshatin Dragostunjë të Librazhdit. Dyshohet se krimi i rëndë të ketë ardhur si rrjedhojë e një xhelozie mes çiftit. Mësohet se ata kanë pasur konflikte edhe më parë por që nuk i ndjekur në rrugë ligjore. Autori i këtij krimi pinte shpesh alkool, ndërsa dyshimet i kishte se bashkëshortja e tij e tradhtonte me ish drejtorin e shkollës në Dragostunjë, ky i fundit pas disa konfliktesh ishte transferuar në një shkollë tjetër. Çifti kishte 4 fëmijë, ndërsa ka qenë djali i tyre 18-vjeçar që i ka gjetur të vdekur dy prindërit.
