“Jam i tronditur thellë. Nuk e di se si erdha në këtë pikë.”. Kështu ka deklaruar nga salla e gjyqit Mexhit Picari, autor i dyshuar për vrasjen e Kudret Saliajt.
Picari vrau me armë zjarri më 4 qershor dhëndrrin, pas procesit të divorcit që viktima kishte nisur me vajzën e tij. Para se gjykata të caktonte ndaj tij masën “arrest me burg”, ish-gardiani u shfaq i penduar para togave të zeza. Mes të tjerash Picari tha se vajza e tij nuk kishte lidhje me vrasjen e Saliajt.
“Kërkoj ndjesë publikisht për çfarë kam bërë edhe falje. Të më falin nipërit dhe mbesat, i kërkoj falje edhe vajzës që i vrara burrin. Dhurata s’ka patur dijeni. Pistoletën e kisha në brez dhe se mora në çantën e gocës”, ka thënë ai.
Po ashtu edhe Dhurata Saliaj ka mohuar të ketë gisht në vrasje. Ajo ka deklaruar s enuk e dinte që babai i saj do kryente vrasjen, pasi në të kundërtën s’do e kishte lejuar kurrë. “Atë ditë isha për gjykatë. S’e dija që babi do bënte vrasje. S’do e lejoja kurrë. Kudreti ishte babai i fëmijëve të mi, s’do e lejoja. Kërkoj mëshirë nga Gjykata, kam tre fëmijë për të rritur”, ka thënë Dhurata.
