Është shtyrë seanca paraprake ndaj 7 të akuzuarve për vrasjen e dyfishtë të Klodian Saliut dhe Vajdin Lamajt në shkurt të 2005, mes të cilëve Lulzim Berisha dhe Emiliano Shullazi.
Seanca në të cilën vendoset nëse çështja kalon për gjykim, kthehet për plotësim të hetimeve ose pushohet, u shty për mosnjoftim të të pandehurit Plarent Dervishaj. Jashtë gjykatës, avokatët e të pandehurve Lulzim Berisha e Plarent Dervishaj këmbëngulën në faktin se procesi është i montuar.
Sipas tyre, deklarimet e të penduarit të drejtësisë, Luftar Reçi, janë të pavërteta dhe të pambështetura në prova. Avokatët Ilia Ilia e Detar Hysi pretenduan se rrëfimi i Reçit ka mashtruar për të përfituar benefite dhe ulje të dënimit.
Të pandehur në këtë dosje janë Emiljano Shullazit, Lulzim Berisha, Plarent Dervishajn, Viktor Ymerin, Taulant Taullai dhe Indrit Rusi.
Dëshmia e Luftar Reçit për vrasjen e Lamajt
Në dëshminë e tij Reçi bën përgjegjës grupin e Lulzim Berishës për vrasjen e Vajdin Lamajt dhe mikut të tij Artan Arsi, vetëm 1 ditë më vonë, në mbrëmjen e 27 Shkurtit, ndërsa organizator Emiljano Shullazin dhe Viktor Ymerin. Ai mësohet të ketë thënë se kishte siguruar minën me telekomandë dhe kishte marrë pjesë në përgatitjen e saj deri në dorëzimin e Emiljano Shullazit. “Në Shkurt të 2005, besoj nga mesi i muajit, më ka telefonuar Lul Berisha. Ai ma tha: Më gjej dhe mua nga ato “nëntat” (kallëpe tritoli). Indriti më tha se ky tritol do të përdorej për një makinë, dhe ajo do të vendosej pranë një mjeti tjetër. Por ky plan ndryshoi. Më pas erdhi Indrit me një pako me C4. Unë pash se minën Indriti ia dha Shullazit”, ka treguar ai. Më tej, Luftar Reçi mësohet të ketë treguar se i kishte telefonuar të nesërmen Lulzim Berishës, pasi kishte marrë vesh ngjarjen nga mediat, se si e kuptoi që mina kishte qenë për të vrarë Vajdin Lamen dhe mënyrën se si është përfshirë në këtë ngjarje Viktor Ymeri. “Menjëherë kam telefonuar Lulin dhe i thashë si u bë kjo punë kështu. Luli më tha: “O lalë, jam larg. Këto janë punë Indriti (për Indrit Taullain). Kur të vijë do flasim. Në bisedë tavoline është thënë nga Indriti me mburrje se “P… e madhe e bëmë copë copë”. Në njërën prej bisedave gjatë takimeve tona u tha se Viktor Ymeri (nga burgu) kishte gjetur personin që do ta vendoste bombën mu pas qafe, në dialekt dibran që të qeshja unë. Indriti tha se Tori ka gjetur njeriun e duhur. Në vitin 2013, në burgun e Peqinit, Viktor Ymeri më ka thënë se “edhe kur u vra Vajdini unë nga burgu i gjeta njeriun që e mbaroi punën e vrasjes së Vajdinit, se ata nuk ia kanë haberin dhe dinë vetëtm të hapen b…”, tregoi ai. Ndërkohë, në dëshmi ka edhe shumë emra të tjerë të personave që janë përfshirë në sigurimin e telefonave dhe kartave të tyre apo të mjeteve të tjera për vrasjet.
