Zbardhen të tjera detaje nga ekzekutimi me armë zjarri i 40-vjeçarit Hekuran Billa, një natë më parë në Tiranë. Dyshohet se ekzekutimi i 40-vjeçarit u krye nga vrasës me pagesë.
Në vendngjarje janë sekuestruar rreth 30 gëzhoja. Ndërkohë, siç raportohet, arma MP5 automatike e përdorur në krim është e ngjashme me ato që përdor garda dhe është çuar në laborator. Kjo armë nuk rezulton e regjistruar në Shqipëri.
Burime për mediat bëjnë me dije se Billa u ekzekutua me dy plumba, teksa ishte në ecje e sipër me automjetin e tij tip “BMW X6”. Mësohet se policia është vënë në ndjekje të autorve, si dhe po bëhet këqyrja e kamerave të sigurisë në zonë për t’i identifikuar.
Pak minuta pas ngjarjes, një automjet u gjet i djegur në Pezë të Vogël, i cili dyshohet se u përdor nga autorët të cilët ekzekutuan Hekuran Billën.
Raportohet se autorët e kanë gjurmuar Billën, i cili fillimisht ndodhej në një lokal. Më pas, ata kanë pritur momentin kur 40-vjeçari është futur në makinë dhe kanë qëlluar drej tij duke e lënë të vdekur në vend.
Sipas dëshmitarëve, një prej autorëve është identifikuar si një i ri me kapele, ndërsa raportohet se autori kryesor, është ndihmuar dhe nga dy persona të tjerë.
Autorët dyshohet se kanë përdorur armë me silenciator. Një gjë e tillë konfirmohet dhe nga dëshmitarët pasi shprehen se nuk kanë dëgjuar të shtëna, por vetëm automjetin e viktimës në ecje e sipër i cili u përplas me dy automjete të tjera.
