Emri i Julian Gjoshit, në kërkim për vrasjen e ndodhur të dielën në Ndroq, del edhe në hetimet e Prokurorisë së Posaçme për ish-deputetin socialist Jurgis Çyrbja.
Bëhet fjalë për një bisedë mes ish-ligjvënësit që akuzohet për shitje sekretesh hetimore dhe Altin Hajrit, pronarit të kompleksit “Golden” në Shijak. Ky i fundit në kërkim për organizimin, rrëmbimin dhe zhdukjen pa gjurmë të Jani Prengës, në janar 2020 në Kamëz, bashkë me persona të tjerë.
Sipas SPAK, Hajri komunikon me Çyrbjen në Janar 2021 dhe e vë në dijeni për arrestimin e kunatit të tij, Julian Gjoshi (i kapur me pistoletë ‘Bereta” më 19 Janar 2021 në Tiranë).
Sipas përgjimeve në SKY ECC, ai i kërkon të ndërhyjë për ta liruar dhe paguante deri në 20 mijë euro, vetëm të prishej prova. Hajri rrëfen se i arrestuari ishte kunati i tij dhe se ishte kapur me pistoletë pa leje. Lirimi duhej bërë në seancën e masës së sigurisë, më 21 Janar 2021.
Vrasja
Julian Gjoshi dyshohet se ekzekutoi me armë zjarri të dielën pasdite (1 Dhjetor), në një lokal në Ndroq, Alfred Dedjan, 50 vjeç dhe më pas u arratis me një makinë “Benz ML” drejt Durrësit.
Vrasja ndodhi në orën 15:30 kur viktima ndodhej i ulur në lokal me një mikun e tij, njëherazi edhe familjar i pronarit të lokalit “Kështjella”, ku ndodhi krimi. Autori, dyshohet se pasi ka hyrë në lokal ka shkuar në tavolinën që ndodhej Alfref Dedja dhe e ka qëlluar menjëherë me armë, duke mos pasur asnjë diskutim mes tyre.
Sipas një rindërtimi paraprak të ngjarjes, viktima është qëlluar disa herë me pistoletë, të cilën 27-vjeçari e ka pasur në xhepin e xhupit dhe nuk e ka nxjerrë për asnjë moment.
Alfred Dedja, ishte banor i zonës dhe në lokal ndodhej si klient. 50-vjeçari njihej edhe me pseudonimin “Daku” dhe jetonte mes Italisë e Shqipërisë. Ndërkohë, policia informoi se është vënë në ndjekje të 27-vjeçarit nga Shijaku, si autor i dyshuar, i cili mendohet se është larguar me një automjet tip “Benz ML”, me ngjyrë të zezë në drejtim të Durrësit.
Pista e parë për hetuesit është prishja e pazareve të drogës. Viktima dhe autori kishin njohje me njëri tjetrin. Alfred Dedja kishte punuar vite më parë edhe si menaxher i kompleksit ‘Golden’ në Shijak, pronë e Altin Hajrit, aty ku u dërgua pas rrëmbimit dhe më pas u zhduk Jan Prenga, në vitin 2020. Në këtë kompleks janë pamjet e fundit ku kamerat e sigurisë kanë kapur imazhet e trupit të Jan Prengës që nxirret nga një mjet Range Rover.
Vrasja ka ndodhur në një moment kur në lokal ka pasur dhe persona të tjerë. Policia ka shoqëruar për të marrë në pyetje dëshmitarët në lokal, por dhe punonjës si dhe të njohur dhe familjarë të autorit Julian Gjoshi. Një prej dëshmitarëve ka treguar se rreth dy orë para se të ndodhte vrasja, e ka parë Julianin në zonë dhe e ka përshëndetur. Grupi hetimor ka sekuestruar dhe kamerat e sigurisë.
