Drejtoria e Përgjithshme e Agjencisë së Mbikëqyrjes Policore ka dalë me njoftim zyrtar pas dy ngjarjeve të rënda që tronditën vendin mbrëmjen e djeshme ku një efektiv policie qëlloi për vdekje kolegun e tij në komisariat, ndërsa një tjetër plagosi një qytetar në zonën e Kombinatit.
Në lidhje me vrasjen brenda komisariatit numër 3 në Tiranë, AMP deklaron se është bërë arrestimi i efektivit Ludian Zaimi, i cili qëlloi disa herë duke i shkaktuar vdekjen kolegun e tij Caush Saliasi pas një konflikti banal.
Nga ana tjetër, për ngjarjen e Kombinatit, ku inspektori i policisë Lavdosh Gjyla qëlloi me armë Murteza Likën, me të cilin ndodhej në një tavolinë duke pirë alkool ka disa hije dyshimi mbi policinë e Tiranës, që në njoftim thanë se Lika ishte plagosur në rrethana të paqarta, dhe se ishte një person me probleme të shëndetit mendor, gjë e cila nuk përmendet nga AMP në njoftimin zyrtar.
Punonjësit e policisë të identifikuar si autorë të dyshuar të ngjarjeve të mësipërme, pas arrestimit të tyre në kushtet e flagrancës, aktualisht ndodhen në dhomat e sigurisë në DVP Tiranë.
