Një ekzekutim me armë zjarri tronditi vendin mbrëmjen e djeshme pak para mesnatës në zonën “Kodra e Diellit” në Tiranë. Gijotina.com raportoi se është qëlluar për vdekje një 39- vjeçar i cili rezulton me dy identitete.
Viktima është identifikuar me emrin Briken Sanaj. Sanaj u ekzekutua me breshëri kallashnikovi nga një automjet tip “Benz” në lëvizje. Ai ka qenë në një nga rrugicat e kësaj zone kur u qëllua për vdekje. Fillimisht ai është dërguar nga banorët e zonës në spital, por ka mbërritur i pajetë, pasi u qëllua me tre plumba në fytyrë. Autorët e ngjarjes janë larguar menjëherë pas krimit. Ndërsa një automjet u gjet i djegur në Qafë Kashar, i cili dyshohet të jetë e ekzekutorëve.
Në të gjitha dokumentet që ju gjetën me vete emri i viktimës është Briken Sanaj, megjithatë, ai njihet nga rojet private te Kodra e Diellit si Anton Gjini dhe kishte më shumë se një vit që ishte rezident te “Kodra e Diellit.”
Policia gjeti në vendngjarje gëzhojat e plumbave me të cilat u qëllua ndaj 39-vjeçarit. Brenda automjetit që po digjej u gjet edhe arma e zjarrit, një kallashnikov.
Policia po heton për të shkuarën e Briken Sanaj, ndërsa pritet që të bëhet ekzaminimi i armës së gjetur në makinë për të rënë në gjurmët e autorëve.
