Personi që shihni në këtë foto është Ajaks Boshnjaku. Lidhje miqësore e Ervin Matës, partnerit të këngëtares së njohur Elvana Gjata, i shpallur në kërkim për masakrën e 4 tetorit në lokal Monopol në zonën e ish-bllokut me një të vrarë e dy të plagosur. Boshnjaku, një emër i padëgjuar më parë në këtë histori, është personi i radhës për të cilin prokurorët Kreshnik Ajazi e Artan Lulo, kanë firmosur urdhër ndalimin, pasi ka dyshime të jetë i përfshirë në krimin që tronditi kryeqytetin.
Nga hetimet rezulton se ai ka qenë i pranishëm në lokal në momentin kur komandoja Meviol Bilo iu kundërpërgjigj sulmit me armë nga Fabian Gaxha, duke lënë të vrarë këtë të fundit dhe duke plagosur Ervis Martinajn e Elio (Esmerald) Hato. Kërkimet policore për kapjen e mikut të Matës deri më tani nuk kanë dhënë rezultat. Ndërsa, vijojnë të jenë ende të paidentifikuar edhe dy persona të tjerë, të pranishëm në vendin ku ndodhi krimi.
/balkanweb/
