Nënkomisari Saimir Hoxha, i cili është shpallur “Dëshmor i Atdheut’ u qëllua për vdekje nga 21-vjeçari, Aldi Rama, i cili më pas qëlloi dhe veten duke ndërruar jetë në spitalin e Traumës në Tiranë. Kjo ngjarje e cila ndodhi më datë 28 Shtator 2021, ka ngritur pikëpyetje të shumta.
Eksperti i sigurisë, Ergys Muzhaqi, u shpreh se në vendin tonë mungon kultura e marrjes së përgjegjësisë dhe e reagimit.
Më tej shton se nuk kishte asnjë element të një operacioni policor, mënyra se si tre policit mes tyre dhe Saimir Hoxha, ndaluan makinën ku ndodhej Aldi Rama.
Muzhaqi: Nuk kishte asnjë element të një operacioni policor, duket sikur ka ndodhur aty për aty. Ky nuk ngjante me një operacion të organizuar. Nga të dhënat, që kemi marrë duket sikur ato kanë shkuar për një punë operative të tyre dhe pastaj ka qëlluar që kanë ndaluar makinën dhe ka ndodhur ajo që ka ndodhur. Operacioni zhvillohet me organizim, ndarje punësh.
Në situata të tilla, duhet të krijohet një kulturë reagimi dhe kultura e marrjes së përgjegjësisë. Në këtë rast dhe në shumë raste të tjera kjo kulturë neve na mungon, në lidershipin politik por edhe profesionale.
Muzhaqi tha se priste që Ministri i Brendshëm, Bledi Çuçi, të jepte dorëheqjen, pasi situata që ndodhi vrasja e policit ishte kaotike.
Muzhaqi: Në këtë rast dëgjuam një deklaratë për shtyp të Ministrit të Brendshëm ku shpreh keqardhjen, ngushëllimet dhe pastaj jepte garancinë që do luftohet lufta kundër krimit. Unë prisja që në atë moment të jepte dorëheqjen, sepse ishte një situatë tejet kaotike mënyra se si ndodhi ngjarja.
