Dosja hetimore e vrasjes së punonjësit të policisë në Lezhë, Xhulio Prela në 5 dhjetor 2020 është kthyer për rihetim.
Shkak i kthimit nga gjykata të dosjes për plotësim hetimi, është bërë një pretendim i ngritur nga avokatët mbrojtës të dy të akuzuarve.
Sipas pretendimit, efektivi i repartit të Forcave të Ndërhyrjes së Shpejtë Xhulio Prela, gjatë periudhës kur ka shërbyer si punonjës policie në Lezhë, është konfliktuar me shtetasin Angjelin Fusha.
Ndërsa personat e dyshuar për vrasjen e të riut janë kushërinjtë, Redion dhe Sokol Hysa.
Arma e krimit një pistoletë tip “TT” u sekuestrua në depozitën e ujit në banesën e Redionit.
Sipas hetimit të kryer dhe dëshmisë së punonjësve të karburantit ku ka ndodhur vrasja e Xhuliano Prelës, mesnatën e krimit rreth orës 02:00, kanë qenë dy makina njëra fuoristradë dhe tjetra tip “Golf 3”, e përshtatur për gjueti. Makina tip “Golf 3” që rroja i karburantit ka treguar qysh në 5 dhjetor në polici, aktualisht është e bllokuar dhe i përket pikërisht, Redion Hysës.
Ndërsa vetëm 23 ditë pas vrasjes së punonjësit të policisë Xhuliano Prela, pikërisht në karburantin ku dhe ka ndodhur ngjarja, është regjistruar në mesnatë një ngjarje e dytë, duke u mitrajluar me 28 plumba kallashnikovi kamioni tip “Man” dhe fasada e karburantit.
Arma me të cilën është qëlluar në këtë ngjarje ju gjend në depozitën e ujit, pikërisht Redion Hysës.
