Prokuroria e Posaçme ka kërkuar dënimin me 12 vite burgim të Bledar Tetës, i cili u arrestua pas vrasjes së ish-efektivit Santiago Malko në Tiranë, në gusht të vitit 2019.
Teta akuzohet për veprën penale të “Vrasjes së kryer paramendim“ në bashkëpunim në kuadër të “Grupit të Strukturuar kriminal”. Në seancën e zhvilluar sot në ambientet e Gjykatës së Posaçme, prokurori i çështjes renditi provat për implikimin e Tetës në vrasjen e Santiago Malkos dhe lexoi pretencën.
Ngjarja
Ish-efektivi i policisë, Santiago Malko u ekzekutua mbrëmjen e 27 gushtit të vitit 2019 brenda makinës së tij tip “BMW X5” në rrugën “Xhanfize Keko”, në zonën e “Xhamllikut”, Tiranë. Malko, ish-polic kishte në pronësi disa pika bastesh sportive. Ky biznes dyshohet të ketë qenë dhe shkaku i vrasjes së tij nga klani Duka. Ai ka qenë i përfshirë dhe në ngjarjen e 4 tetorit 2018, ku dhe ndodhi vrasja e Fabian Gaxhës në ish-Bllok pas një përplasjeje me armë. Santiago Malko ka qenë i ndjekur prej disa kohësh nga vrasësit e tij dhe më pas është qëlluar me kallashnikov e pistoletë mbrëmjen e 27 gushtit. Në fillim ish-efektivit i është bllokuar rruga nga një prej makinave të atentatorëve e më pas personat e tjerë që ishin në një furgon kanë qëlluar me breshëri kallashnikovi në drejtim të tij.
