Të tjera detaje janë publikuar mbi vrasjen e 53-vjeçarit shqiptar Arjanit Rizai në Guyaquil në Ekuador.
Mediat vendase raportojnë se ndaj shqiptarit, i cili ndodhej në një automjet me nghyrë gri është qëlluar të paktën 9 herë me një armë zjarri 9 mm.
Viktima kishte parkuar makinën pranë urgjencës së spitalit Luis Vernaza, në qendër të qytetit Guyaquil në Ekuador, ku po priste bashkëshorten e tij, e cila kishte shkuar për të vizituar babain e saj, që po merrte ndihmë mjekësore.
Autorët kanë mbërritur me motoçikletë dhe pasi kanë kryer vrasjen janë larguar me të njëjtin mjet me të cilin kanë mbërritur. Disa persona, dëshmitarë të krimit, kanë tentuar të ndihmojnë 53-vjeçarin, i cili nuk i ka mbijetuar plagëve dhe ka humbur jetën në spital.
Policia ekuadoriane nuk ka dhënë shumë detaje mbi ngjarjen e rëndë, ndërsa shqiptari raportohet se nuk punonte në Ekuador, pasi nuk kishte dokumente. Policia ka mbledhur dëshmi nga personat e ndodhur në vendin e ngjarjes, por edhe nga bashkëshortja e viktimës. Policia ka konfirmuar se mbi viktimën është qëlluar me një armë 9 mm.
