Gjykata e Apelit ka marrë sot vendimin përfundimtar për 7 të pandehurit që vranë në 2019 të riun i cili punonte si teknik kondicionerësh. Sipas të dhënave, Apeli ka lënë në fuqi vendimin e Shkallës së Parë, në lidhje me ngjarjen e rëndë që ka të bëjë me vrasjen e të riut që punonte si teknik kondicionerësh. Evidentohet se që nuk është ndryshuar asgjë nga ai vendim i një viti më parë, ku për ekzekutimin e Indrit Çelës, Gjykata dha përfundimisht dënimin me 23.4 muaj burg. Vetëm njëri nga të zotët e vilës në të cilën punonte djali u shpall fajtor për vrasjen, duke e dënuar me 18 vite burg, por që duke aplikuar gjykimin e shkurtuar, ai do të vuajë dënimin vetëm me 12 vjet. Pjesa tjetër e të pandehurve, përfshirë të atin e tij, vëllanë dhe katër persona të tjerë u dënuan nga një deri në 3 vite burg, pasi në të gjitha rastet u aplikua gjykimi i shkurtuar.
Autorët e dënuar me vendimin e 22 prillit të vitit 2021 i çuan në Apel dënimet e tyre me qëllimin që kjo shkallë gjykimi të ndërhynte për të prishur vendimin e shkallës së parë, por Gjykata nuk e ka ndryshuar fare vendimin. Përfundimisht është lënë e njëjta masë, për të gjithë vetëm 23.4 vite burg. Të dënuarit janë Griseldo Kusi, Albano Kusi, Bujar Kusi, Ferdinand Bakalli, Luan Çaka, A.I dhe A.H të akuzuar për kryerjen e veprave penale të “Vrasja me dashje”, “Mbajtja pa leje të armëve luftarake”, “Veprime që pengojnë zbulimin e së vërtetës” “Moskallëzim i krimit” dhe “Përkrahja e autorit të krimit”
Kujtojmë se ngjarja ka ndodhur me datë 22.08.2019, kur në Rrugën “Muhamet Gjollesha”, është qëlluar në kokë me armë zjarri shtetasi Indrit Çela, i cili ishte duke punuar për montimin e kondicionerëve, në banesën në pronësi të shtetasit Bujar Kusi.
