Pas thuajse 24 orë nga nisja e procesit të votimit, ka përfunduar numërimi i votave për zgjedhjen e kreut të degës së PD në Bulqizë. Pas numërimit të votave, kandidati Fatos Hoxha ishte votuar nga 587 anëtarë, ndërsa kandidati tjetër Shaqir Manjani nga 442 anëtarë, duke bërë që kryetar i ri i PD në Bulqizë, të zgjidhej Fatos Hoxha.
Kujtojmë se zgjedhjet për kryetarin e ri të degës së PD në Bulqizë janë shoqëruar me tensione dhe akuza që të dielën. Kandidatët Fatos Hoxha dhe Defrim Fiku akuzuan për tjetërsim të listës së votuesve ku sipas tyre në të ishin shtuar rreth 500 emra, numër i cili mund të bënte fitues kandidatin Shaqir Manjani.
Ndërkohë, kandidati Defrim Fiku i cili mbante aktualisht detyrën e Kryetarit të PD në Bulqizë u tërhoq nga gara duke lënë të garonin mjeku Fatos Hoxha dhe avokati Shaqir Manjani.
Procesi është shoqëruar me tensione dhe dhunë mes simpatizantëve, duke u ndërprerë disa herë. Simpatizantë të të dy kandidatëve shqyen derën e sallës ku po zhvillohej procesi zgjedhor, duke u përleshur fizikisht me njëri-tjetrin, ku pas ndërhyrjeve nga Rithemelimi, procesi iu rikthye normalitetit.
