Anëtarja e Komisionit të Rithemelimit, Albana Vokshi, ka folur sot mbi videon që doli nga procesi i numërimit të votave për kandidatët e degëve, ku në një pikë numërimi dëgjoheshin anëtarët që kishin paqartësi në lidhje me numrin e anëtarëve të cilët kanë marrë pjesë në procesin e votimit. “Jo, jo, futja 250. Futja mor 300 aty se e rrumbullakosim pastaj. Po ç ‘rëndësi ka…,”-u dëgjuan të thonë në video numëruesit.
Vokshi sqaroi se bëhej fjalë për numrin e fletëve të prodhuara dhe jo për votuesit. Më tutje ajo tha se video u nxor nga konteksti dhe u keqpërdor. “Ka qenë dashakeqësi një video e dalë jashtë kontekstit. Unë gjej rastin ta shpjegoj në respekt të publikut shqiptar. Në videon e shpërndarë mbrëmë është rreth fletëve totale të votimit që janë në vënë në dispozicion të dy tavolinave. Është një numër total i parëndësishëm. Nuk ishin në dijeni për numrin total të prodhuar. Diskutimi po bëhej për këto fletë. Kjo nuk e cenon procesin që mbetet transparent. PD është e vendosur në vullnetin e saj për transparencë të plotë”, sqaroi ajo. Ajo theksoi se procesi i votimit dhe numërimit ishte transparent dhe për këtë nuk ka asnjë dyshim.
