Rozeta Dobi nuk ishte një person rastësor që ishte punësuar për mirëmbajtjen e shtëpisë së ish-zyrtares Alda Klosi, ku dhe vodhi 120 mijë euro e një koleksion të tërë bizhuterish floriri. Rekrutimi i saj, ka ardhur pikërisht nga Ministria e Financave, në kohën kur drejtohej nga Arben Ahmetaj.
Mësohet se ajo është futur si e njohura e partneres së Ahmetajt dhe kështu, rekomandimi i saj për pastrimin e mirë që bënte në shtëpi, shkoi zinxhir. Kjo gjë i solli Rozeta Dobit një punë stabël dhe 5 vitet e fundit ishte punësuar nga Klosi.
Në telefonin e saj që është sekuestruar si provë janë gjetur më shumë se 20 kontakte të nëpunësve të Ministrisë së Financave. A i ka vjedhur dhe ata si Klosin?
Deri në këto momente nuk ka asnjë kallëzim për më shumë se 400 mijë eurot e gjetura në tubin e aspirimit të shtëpisë së saj, të cilat kanë mbetur ‘jetim’ në Prokurori. Çdo ditë, paraqiten njerëz që kanë pasur marrëdhënie pune me Dobin, por identifikojnë ndonjë bizhuteri mes koleksionit dhe largohen. Për paratë, askush s’di asgjë!
Vjedhja e shtëpisë së Klosit ndodhi më 15 dhjetor dhe u pikas nga vajza e ish-zyrtares, pasi Rozeta Dobi dhe djali i saj Havieri kishin hapur derën me forcë dhe e kishin inskenuar si grabitje. Por, kamerat e sigurisë zbuluan gjithçka. Tashmë nënë e bir janë në pranga. Ata kanë pranuar autorësinë e ngjarjes, por njësoj si zyrtarët, nuk dinë të thonë se kujt i përkasin 400 mijë eurot.
