Presidentja e Kosovës Vjosa Osmani ka udhëtuar nga Kosova për t’i dhënë lamtumirën e fundit ish-kreut të shtetit shqiptar, Bujar Nishani, i cili u nda nga jeta pak ditë më parë.
Osmani është pritur nga homologu i saj shqiptar Ilir Meta i cili e ka shoqëruar atë nga ambientet e jashtme drejt sallës “Skënderbeu”, ku po mbahen homazhet në nder të Nishanit.
Pasi ka nderuar ish-presidentin, Vjosa Osmani është takuar me familjarët e tij duke i shprehur ngushëllime për humbjen e njeriut të afërt.
Ceremonia shtetërore e përcjelljes së ish-presidentit Bujar Nishani ka nisur në orën 10:00. Figura të larta të politikës, ministra, deputetë, kanë kryer homazhet në Presidencë. Në orën 12:00 arkmorti me trupin e pajetë të Nishanit do të dalë nga Presidenca për t’u përcjellë për në banesën e tij të fundit në varrezat e Sharrës.
