Deputetja demokrate, Oriola Pampuri ka reaguar pas deklaratave të deputetiy Flamor Noka se Enkelejd Alibeaj po pengon bashkimin e demokratëve dhe po mbahet peng nga kryeministri Edi Rama dhe ish kreu i PD, Lulzim Basha.
Pampuri akuzon Nokën se po gënjen dhe se qëndrimi i tij nuk është ai i shumicës dërrmuese të grupit parlamentar, ndërsa shton se çdo deputet i PD ka përgjegjësinë që në këtë moment të vështirë të tregojë maturi dhe përgjegjshmëri në çdo komunikim me publikun.
“Gënjeshtrat dhe mashtrimi në emër të deputetëve të PD nga kolegu Flamur Noka, janë një fyerje e rëndë për secilin prej nesh. Deformimi me dashje në publik i qëndrimeve tona, pa asnjë autoritet nga Grupi Parlamentar, jashtë realitetit të mbledhjes së djeshme, jashtë diskutimeve të përgjegjshme të secilit prej kolegëve të Grupit Parlamentar, nuk ndihmon në bashkimin e demokratëve. Askush nuk ka të drejtë të shpall qëndrimet e tij të izoluara si diskutime të Grupit Parlamentar. Gjej rastin të ritheksoj qëndrimin e shumicës së deputetëve të Grupit Parlamentar për ndaljen e gjuhës së urrejtjes, shantazhit, përçarjes, fyerjes, sulmit dhe arrogancës mes demokratëve. Çdo deputet i PD ka përgjegjësinë që në këtë moment të vështirë për PD të tregojë maturi dhe përgjegjshmëri në çdo komunikim me publikun, për të mos i fryrë më shumë rrugës së përçarjes”, shprehet Pampuri.
