Trajneri i Unionit të Berlinit, Nenad Bjelica humb toruan dhe ‘kap me shpulla’ sulmuesin e Bayern të Mynihut, Leroy Sane.
I gjithë episodi i shëmtuar ka ndodhur në minutën e 74-t të ndeshjes mes Bayernit të Mynihut dhe Unionit të Berlinit, teksa trajneri kroat i kryeqytetasve u detyrua të shkojë para kohe në dhomat e zhveshjes.
Gjithçka ndodhi pas një topi të dalë jashtë vijës anësore, të cilin sulmuesi i Bayernit donte ta niste menjëherë, por tekniku kroat nuk po e lëshonte nga duart.
Fillimisht ishte Sane ai që goditi me inat mbi topin në duart e kroatit dhe më pas Bjelica që vuri të paktën dy herë duart në fytyrën e sulmuesit gjerman, teksa vetëm ndërhyrja e stafit teknik bëri që situata të mos degradonte edhe më shumë.
Arbitri ndëshkoi me karton të kuq teknikun kroat të Unionit, që ndoqi nga dhomat e zhveshjes minutat e mbetura të ndeshjes, e cila u fitua me rezultatin minimal 1-0 nga gjigantët e Mynihut, falë golit të shënuar nga Guerreiro.
“Mu fut në zonën time dhe reagova. Por kjo është e papranueshme, nuk kam reaguar ashtu siç duhet të reagojë si trajner. E kuptoj pse mora karton të kuq. Jam i zemëruar për një penallti të mundshme për ne para kësaj”, deklaroi trajneri kroat.
Bjelica u ka kërkuar falje lojtarëve të tij, por jo Sanes sepse beson se e ka provokuar.
“Isha në hapësirën time, doja të merrja topin dhe t’ia jepja Sanes. Ai më shtyu dhe sigurisht që reagova. Ai erdhi të më provokonte në hapësirën time”, ka deklaruar Bjelica.
Nenad Bjelica vs Leroy Sané pic.twitter.com/xYgkrcTDaO
— Sir ALTINAY (@AItinay) January 24, 2024
