Në redaksinë e emisionit “Stop” mbërriti një video nga fshati Shezë i Bashkisë Peqin, e cila tregon se në oborrin e kopshtit digjen mbetje spitalore të rrezikshme që prodhohen nga qendra shëndetësore.
Në fakt, ambienti ku edukohen rreth 15 fëmijë në sistemin parashkollor, dikur ka qenë qendra e vjetër shëndetësore, por është parë e udhës që ata të sistemohen aty.
Mësuesja dhe prindërit e fëmijëve pohuan se këto mbetje vijnë nga qendra e re, që ndodhet përballë dhe infermierët i vënë flakën në shkelje të ligjit.
“Kam ardhur direkt, kam kontrolluar të gjithë pjesën. Në momentin që kanë djegur mbetjet i kam lajmëruar edhe 2 ditë më përpara dhe u kam thënë ju lutem këtu nuk lejohet të digjen mbetje. Shqetësim aq i madh saqë kam komunikuar me drejtuesen e kopshtit, drejtuesin e njësisë vendore dhe ata më thanë që garantojmë se këtu nuk do ndodhë më. Vijnë nga qendra këtu”, tha Albana Dranga, edukatore.
“Po të vish kur ndizet zjarri kërcet shishja si ndonjë bombë”, tha një prind.
“Është shumë, shumë e rrezikshme të digjen mbetje kaq të rrezikshme në një ambient ku rrijnë fëmijët e kopshtit”, tha një tjetër.
Megjithëse qendra nuk pranon të jetë ajo shkaktarja edhe administratori i njësisë, që për më tepër nuk e ka idenë se si funksionon menaxhimi i mbetjeve, pohon se doktori ka pranuar që ato të mos digjen më aty.
“Nuk mund të flas. Mbetjet spitalore vijnë e i marrin. Çfarë po bëj mor zotëri?”, tha një punonjëse e qendrës shëndetësore.
“Është një person që mban përgjegjësi për këtë, të lutem”, tha një tjetër./ Tv Klan
