Zjarri që përfshiu zonën e Tales së Lezhës është shuar pas disa orësh, por duke shkrumbuar një sipërfaqe të madhe toke. Fatmirësisht, kanë qenë ndërhyrjet intensive të forcave zjarrfikëse por edhe të banorëve të zonës që parandaluan flakët të përhapeshin më tej. Izolimi dhe shuarja e kësaj vatre u bë disa orë pas përhapjeve të flakëve. Policia po heton nëse ky zjarr është vënë në mënyrë të qëllimshme.
Kujtojmë se pak javë më parë ishulli i Sazanit u përfshi nga flakët, ku u shkrumbua një sipërfaqe e madhe bimësie, si shkurre dhe pyje ndërkohë mungesa e helikopterëve bëri që zjarri të zgjaste disa ditë. U desh ndihma e një helikopteri grek, i cili në më pak se 8 orë arriti të shuajë zjarrin në ishull.
