Policia e Tiranës ka zbardhur ngjarjen e ndodhur një javë më parë te rrethrrotullimi i Freskut, ku një 26-vjeçar u dhunua rëndë me sende të forta. Hetimet treguan se konflikti nuk nisi në terren, por në rrjetet sociale, ku debatet dhe ofendimet janë përshkallëzuar deri në porositjen e një sulmi fizik.
Sipas burimeve zyrtare, porositësi i dhunës ka qenë Gjokë Ndrevataj, i njohur në rrjetet sociale me nofkën “Aron”. Bashkë me të ka vepruar edhe një tjetër personazh i TikTok-ut, Xhemal Uka (“Fire”). Të dy dyshohet se kanë porositur shtetasin Helidon Marku për të kryer agresionin ndaj të riut.
Helidon Marku, i cili tashmë është arrestuar, rezulton të jetë person me precedentë penalë të rëndë. Ai është dënuar më parë me 11 vite e 8 muaj burg për plagosjen e 4 shtetasve marokenë dhe 2 shqiptarëve në Itali, gjatë një episodi të dhunshëm në vitet e kaluara.
Pamjet e sulmit u publikuan në TikTok, ku shfaqet momenti i dhunës së rëndë që i është ushtruar 26-vjeçarit, çka ka ndihmuar policinë në identifikimin e të përfshirëve.
Ndaj Ndrevataj dhe Ukës është shpallur kërkimi, ndërsa hetimet po vijojnë për zbardhjen e plotë të ngjarjes, motivet dhe personat e tjerë që mund të jenë të përfshirë.
