VIDEO/ Eurogol i mesfushorit shqiptar, në fund festa me shqiponjë –

Disa prej lojtarëve shqiptarë që po aktivizohen me skuadrat e tyre në kampionate të ndryshme po dhurojnë gola spektakolarë dhe natyrisht mund të jenë një alternativë e mirë për trajnerin Sylvinho, krahas grupit të lojtarëve që siguruan kualifikimin në Euro2024, por jo vetëm, kryesuan Grupin në ndeshjet kualifikuese.

Ndoshta të gjithë presin ftesën për t’iu bashkuar kombëtares, ndërsa javën që sapo u mbyll tërhoqën vëmendjen Rey Manaj në Turqi dhe Lindon Selahi në Kroaci.

Mesfushori po realizon paraqitje të shkëlqyera me skuadrën e Rijekës, të cilën e ka ngjitur në krye të klasifikimit me golin e shënuar këtë fundjavë.

24-vjeçari i dha suksesin e plotë me përmbysje Rijekës në udhëtim 1-2 kundër Hajdukut të Splitit. Përballja direkt për kreu e pa Rijekën të merrte tri pikë në “Poljud”, duke siguruar edhe kreun e renditjes pas një kryevepre të mesfushorit kuqezi, që në fund festoi me ‘shqiponjë’.

Pukstas kaloi skuadrën e Splitit në avantazh, teksa në pjesën e dytë Rijeka barazoi me Obregon, para se Selahi në të 75 minutë të lëshonte një “predhë” me të jashtmen e së djathtës, për tri pikët e Rijekës.