Një video e re e një kamere sigurie në zonë tregon më qartë momentet e ekzekutimit të Klaudio Prendit në Tiranë, 29-vjeçari i cili u vra me armë zjarri orët e para të së martës, në rrugën Xhanfize Keko.
Në pamje duket djali i ish-gjyqtarit Fran Prendi i cili futet në makinën tip “Benz G Class” (pasi del nga një lokal aty pranë). Pak sekonda pasi mbyll derën e automjetit, një automjet tip “Audi” afrohet, ndalon paralel me mjetin e të riut dhe nisin të shtënat që zgjasin disa sekonda. Shenjat e plumbave dallohen edhe në xhamin e makinës “Benz”.
Hetuesit kanë zbuluar se autorët që erdhën nga rruga e Freskut u larguan drejt Farkës, ku dogjën makinën. Aty policia ka gjetur një pistoletë plotësisht të shkrumbuar. Makina tip “Audi A4” e autorëve rezulton e vjedhur një vit më parë në zonën e Liqenit Artificial në kryeqytet. Identifikimi u bë nga numri i shasisë së makinës që u rikuperua nga ekspertët. Pronari i mjetit e ka denoncuar mjetin e vjedhur që në kohën kur ka ndodhur ajo.
Policia ka dyshime se i riu ka pasur një shumë rreth 15 mijë Euro për të kthyer dhe për këtë arsye dyshohet se është konfliktuar me grushta disa ditë më parë. Kjo është një tjetër pistë në tavolinën e hetuesve, por deri më tani nuk dihet me saktësi se çfarë fshihet pas ngjarjes.
Ka gjithashtu të dhëna se vrasja mund të ketë ardhur si pasojë e një konflikti që e ka zanafillën nga bastet e paligjshme.
Babai i viktimës, ish-gjyqtari Fran Prendi, në dëshminë e tij ka thënë që ishte në dijeni që djali i tij kishte konflikte me të tjerë, por nuk e mendonte sa do të përfundonte deri në atentat.
Pamje e publikuar më herët
