Vetëvrasja e Ilvi Metës në Komisariatin e Policisë së Kavajës ka vënë në lëvizje Avokatin e Popullit.
Në njoftimin zyrtar, AP bën me dije se ka mbledhur të gjitha materialet nga institucionet që janë marrë me këtë çështje dhe po heton.
Sipas Avokatit të Popullit, janë marrë në duart e grupit të inspektimit nga Mekanizmi Kombëtar për Parandalimin e Torturës, Trajtimit ose Dënimit të Egër, Çnjerëzor ose Poshtërues i drejtuar nga Komisioneri Ahmet Prençi pamjet filmike, dosjet e rezultatet e ekspertizës ligjore.
Dyshohet se 31-vjeçari ka kryer vetëvrasje duke përdorur lidhësen e kapuçit të bluzës që mbante veshur. Nga ana e ekspertëve mjeko-ligjorë është bërë këqyrja e viktimës nga ku ka rezultuar se në trupin e tij nuk janë konstatuar shenja dhune.
Si pasojë e neglizhencës në punë janë arrestuar tre policët që ishin në turn pasi nuk arritën të parandalonin vetëvrasjen. Por nga ana tjetër, babi i të ndjerit ka deklaruar i sigurt se djali i tij është vrarë dhe nuk i ka dhënë fund jetës me dëshirë.
Dhe familjarë të tjerë kanë hedhur akuza të forta ndaj policisë se 31-vjeçari është vrarë. I riu u arrestua ditën e djeshme pasi akuzohej se kishte kryer vjedhje në një banesë, ndërsa dhe më herët ishte shoqëruar në polici për të njëjtën vepër penale.
