Komisioni i Organizimit të Zgjedhjeve në Partinë Demokratike, ka njoftuar ndryshime në rregulloren e zgjedhjeve për kryetar edhe pse deri tani në garë është vetëm ish kryeministri Sali Berisha.
Ka qenë Eno Bozdo që ka prezantuar risitë duke thënë se rregullorja e re pritet të caktojë një proces të drejtë për kandidatët, ndonëse deri tani vetëm Berisha ka shpallur kandidaturën.
“Rregullorja ka disa ndryshime drastike që sigurojnë një proces të drejtë për të gjithë kandidatët, rregullorja në parimet e përgjithshme mbi të gjitha sanksionon kontroll të njëjtë të kandidatëve mbi procesin zgjedhor. Kandidatët ftohen që të prezantojnë platformën e tyre, në të gjitha degët e bazës, kandidatët mund të ketë një vëzhgues pranë komisionit për organizimin e zgjedhjeve. Çdo kandidat ka të drejtë që të kenë një komisioner në tavolinën e votimit, për të ndjekur nga afër të gjithë procesin. Ndryshimi tjetër që është thelbësor, është aksesi i kandidatëve në listat zgjedhore, në emër të të dhënave personale, një akses i tillë nuk ka qenë i mundur. Komisioni ynë ka përgjegjësinë ti japë çdo kandidati listat zgjedhore, për herë të parë kandidatët do të kenë në dorë listën zgjedhore në çdo degë që ata do të kërkojnë. Aksesi i kandidatëve në zyrën e shtypit, që deri tani nuk ka qenë i barabartë. Rregullorja detyron zyrën e shtypit që të trajtojë njësoj zyrën e shtypit”, tha Bozdo.
Zgjedhjet për kreun e PD do të mbahen më 22 maj, por duke qenë se deri më tani vetëm Berisha ka shpallur kandidaturën, pritet që në këtë datë të mbahet një referendum ku demokratët të votojnë nëse e duan rikthimin e tij në krye të PD.
