Bashkitë në vendin tonë prej vitesh vazhdojnë të jenë problematike dhe të paafta në menaxhimin e vendit. Dhe pavarësisht se iu është “tërhequr” veshi disa herë edhe nga organizatat ndërkombëtarë, vendorët vazhdojnë të bëjnë “rrush e kumbulla” ato para që duhen investuar për nevojat bazë të taksapaguesve. Rastet më të shumta të abuzimeve janë për ato shërbime ë kryhen përmes tenderëve. Në këto shkelje numër një mbetet bashkia Tiranë, por këtë herë pjesë e kësaj vorbulle është bërë edhe Bashkia Dibër.
Pak ditë më parë është denoncuar pranë Komisionit të Prokurimit Publik tenderi me objekt “Rikonstruksion dhe sistemim asfaltimi i rrugës SHISH-Unaze, Bashkia Dibër 2021”. Vetëm për rikonstruksionin e kësaj rruge Bashkia Dibër, si një nga më të varfrat në vend, ka vendosur të shpenzojë plot 15,055,373 lekë. Por, edhe pse disa kompani janë ofruar ta kryejnë këtë shërbim me më pak para, Bashkia Dibër nuk ka pranuar dhe i ka skualifikuar nga gara të gjitha. Ndërkohë në ankesën e bërë, përveç faktit se po shpenzon kaq shumë para për rikonstruksion, vërehet se tenderi është zhvilluar në shkelje të ligjit dhe Bashkia ka skualifikuar nga gara pa të drejtë pjesëmarrësit, duke lënë hapësira për abuzime dhe burokraci.
Shkeljet e evidentuara
Ankimuesi është kompania “2N”, e cila ka ofruar ta kryej këtë shërbim vetëm me 11,997,488 lekë, pra 4 milionë lekë më lirë. Por, Bashkia e ka skualifikuar me justifikimin se; 2N nuk ka paraqitur dokumente provuese për furnizimin e tij me Prodhime asfalti; në listën e çmimeve kemi konstatuar gabime aritmetike dhe nuk ka paraqitur dokumente provues për të vërtetuar stafin teknik dhe inxhenerik. Por, të gjitha këto pretendime të bashkisë ankimuesi i hedh poshtë dhe në shpjegimin dërguar KPP vërteton se pikat e mësipërme janë kriteret shtesë burokratike të shtuar nga Bashkia Dibër.
Së pari, edhe vetë KPP e konfirmon se, kompania “2N” gëzon dhe vërteton se ka kapacitete për prodhim dhe furnizim asfalti, ndërsa kërkesa e një certifikate të vecantë për stafin teknik është një kriter i panevojshëm në këtë rast. Ndërkohë, më tutje 2N pretendon se Bashkia Dibër ka pranuar si pozitive ofertën e një kompanie tjetër, e cila gjithashtu përmbante probleme teknike dhe kishte ofertë shumë më të ulët, ndërsa ofertën e tij e konsideron anomalisht të ulët. Në këtë pikë edhe KPP shprehet se në rastet kur Bashkia, si autoritet kontraktor vëren gabime në dokumente duhet të vënë në dijeni kompaninë dhe t’i jap asaj mundësinë e korrigjimit. Por bashkia Dibër nuk e ka bërë.
Më tutje, nga përllogaritjet e bëra sipas ligjit, KPP vërteton pretendimin e ankimuesit se oferta e paraqitur prej tij mund të mbulojë fare mirë shërbimin që kërkohet nga autoriteti kontraktor. Në këtë kuadër, KPP ka vendosur që Bashkia Dibër të anulojë vendimin e KVO-së mbi skualifikimin e operatorit ekonomik “2N” SHPK, si dhe të korrigjojë shkeljet, duke e kualifikuar këtë operator ekonomik. Shpresojmë që të paktën kjo bashki të ketë marrë mësim dhe të mos bëhet më pjesë e aferave të tjera, që cenojnë fondet e taksapaguesve shqiptarë./ E.H/Gijotina.com/
