Kompania “KASTRATI shpk” është bërë e preferuara e qeverisë dhe e vendorëve, si e tillë përfiton çdo projekt pa garuar fare. Këtë herë Kastrati ka marrë “dhuratën” e radhës nga Emirana Sako, kryetare e Bashkisë Durrës. Bëhet fjalë për një tender me vlerë 162.634.332 lekë, numër reference REF – 22345-03-17-2022 dhe objekt blerje karburanti. Ky tender ka shkelur hapur rregullat bazë në ligjin për prokurimet, pasi ka pasur vetëm një ofertues dhe ai është Kastrati.
Ligji kërkon që në këto raste tenderi të anulohet për të rihapur një tjetër procedurë. Por Emiriana Sako, nuk ka pritur gjatë dhe i ka dhënë tenderin pa garë Kastratit, në një kohë kur vendi vuan për krizë karburanti. Prandaj dhe ku tender klasifikohet automatikisht në kontratat me “Flamur të kuq”, pasi cenon konkurrencën dhe krijon hapësira për abuzime.
Ndërkohë, shkelje tjetër është fakti që Kastrati ka paraqitur një ofertë me vlerë 162 milionë lekë, pra po aq sa fondi limit. Ndërsa ligji kërkon që ofertat të jenë më të lira se fondi limit, me qëllim që të mos abuzohet dhe keqshfrytëzohen fondet publike. Emiriana Sako si duket nuk e di këtë rregull, pasi çdo tender e jep me vlera të larta. Pastaj kur bëhet fjala për Kastrati shpk, edhe vetë qeveria nuk i kursen para.
Megjithëse këtu jemi në një paradoks të madh, pasi kryeministri Edi Rama vazhdon të përsëris se jemi në krizë për shkak të luftës dhe madje iu tregon qytetarëve se si duhet të kursejnë, që të mos shpenzojnë naftë. Ndërsa Sako për naftën e makinës që lëvizë ajo dhe miqtë e saj në bashki shpenzon miliona euro, pa iu dridhur qerpiku dhe në flagrancë me ligjin.
Ndërkohë, kujtojmë se edhe pak javë më parë Gijotina.com ka denoncuar një rast kur Kastrati shpk ka përfituar një tjetër tender pa garë. Ishte Ministria e Bujqësisë ajo që i fali 6.5 milionë euro nga fondet publike për tenderin e objekt “Blerje karburant për skemën e rimbursimit të fermerëve”. Ky tender u shpall në 14 shkurt 2022 si pjesë e skemës për rimbursimin e fermerëve, ndërkohë që shpallja e fituesit u publikua më 16 mars 2022.Në garë nuk kishte asnjë kompani tjetër pjesëmarrëse përveç bashkimit të operatorëve “KASTRATI” SHPK & “KASTRATI GROUP” SH.A të cilët u shpallën automatikisht fitues. Kjo nuk është hera e parë që pronari i këtyre kompanive fiton tenderë pa garë, të cilët renditen me flamur të kuq për sjellje të mundshme klienteliste sipas “openprocurement.al”. Pra, çdo tender Kastratit i jepet pa garë, si një kompani mike e qeverisë.
