Kryeprokurori i Prokurorisë Themelore të Ferizajt, Shukri Jashari, ka dhënë një deklaratë për vrasjen që ndodhi në orët e para të mëngjesit në Ferizaj ku mbeti i vdekur një 30-vjeçar, ndërsa i dyshuar për vrasjen është vëllai i reperit të njohur Buta, Qëndrim Januzi.
Në një prononcim për Gazetën Express, Jashari ka thënë se motivi i vrasjes s’dihet ende, meqenëse ende s’është intervistuar dëshmitari që ishte bashkë me viktimën kur ndodhi vrasja. Kryeprokurori ka bërë me dije se tashmë kanë nisur hetimet edhe për zyrtarin policor, që e plagosi të dyshuarin për vrasje.
“Jo, ende nuk dihet motivi i vrasjes, për shkak se dëshmitarët që kanë qenë me viktimën ende nuk janë intervistuar. Një ka qenë, në bazë të video-incizimeve shihet vetëm një person. Edhe ndaj zyrtarit policor kanë filluar hetimet në bashkëpunim me Inspektoratin Policor të Kosovës”, ka thënë Jashari për Express.
